Оби ҳаёт
Хизри ҷон оби ҳаёт аз лаби дилҷӯйи ту ёфт,
Мӯсӣ анвори таҷаллӣ ҳама аз рӯйи ту ёфт.
Мурдаро зинда аз он кард Масиҳо ба даме,
К-аз дами боди саҳаргоҳи азал бӯйи ту ёфт.
Хоҷаи ҳар ду саро Аҳмади маҳмудхисол
Ҳусни ахлоқу макорим ҳама аз хӯйи ту ёфт.
Ҳар киро буд саре, дар сари савдои ту шуд
В-он киро буд диле гумшуда, дар кӯйи ту ёфт.
Дар миёни зулумоти сари зулфи ту, Камол,
Ҳамчу Хизр оби ҳаёт аз лаби дилҷӯйи ту ёфт.
(Мавлоно Камоли Хуҷандӣ)
Сомонаи фарҳангӣ-иҷтимоии Қаламонлайн
