Дафтари андешаҳо
Аз дафтари андешаҳои Устод Луқмон Бойматов
Доираи ҳастии ҳақ маҳдуд нест. Худованд дур нест, инсонҳоянд, ки хештанро аз Ӯ-и танҳо бар дур гирифтаанд.
***
Огоҳ бояд шуд, чун оғози бунёди саъодати хеш ва ободии меҳан аз худшиносист.
* * *
Руҳу Ишқ ва Зебоӣ, дар воқеъ чеҳраи аслии Ҳақиқатанд.
* * *
Имони ҳақиқӣ дар виҷдон ва садоқати шахсият ошкор мегардад.
* * *
Ҷонкоҳтарин яъс он бошад, ки мутмаинтарин ашхос ханҷари хиёнат бар синаи Садоқат мезананд.
* * *
Дар сухан гуфтан ҳам ҳаё кун! Агар дар гуфторат ҳисси ҳаё нест, яқин медоранд, ки рафторат низ тибқи пиндорат аст.
* * *
Тафаккур ойинаи шахсият аст.
* * *
Ӯ аз ин ки имрӯз иззаташро хор карданд, шодмон буд, чаро ки ҳамеша аз ситоишгаронаш меҳаросид.
* * *
Ҳар зараре ақле зиёда кунад.
* * *
Мардум покиро фаромӯш карда, намехоҳанд бифаҳманд, ки рӯшаноии олам аз ихлосу нияти пок аст.
* * *
Худ зиндагӣ дарёи дониш ва ҳар зарраи хоки Замин маъбад аст.
(Манбаъ: “Фиребхӯрдагонем”, Луқмон Бойматов)
Қаламонлайн
