Хоҳам ки ба ту роз бигӯям як дам
Субҳӣ Ҷавҳаризодаи Истаравшанӣ
Рубоиёт
Даврон чу туро ба арши аъло дорад,
Рӯзе ба сафи пиёдагон бигзорад.
Ҳарчанд ки ҳампари саҳоб аст уқоб,
Охир ҷасади варо замин бардорад.
* * *
Ба чашмам нури рахшонам ту бошӣ,
Шабонгаҳ моҳи тобонам ту бошӣ.
Мунаввар гашт ин дил аз зиёят,
Ки меҳри партавафшонам ту бошӣ.
* * *
Эй тозагули баҳор як ханда намо,
Бо ишва назар карда дилам банда намо.
Хоҳам ки ба ту роз бигӯям як дам,
Оинаи дил ба лутф рахшанда намо.
* * *
Ба дил тире задӣ бо як нигоҳат,
Рабуда қалби мо чашми сиёҳат.
Надида одамӣ мислат ба дунё,
Ҷаҳони ҳуснию кони малоҳат.
Субҳӣ Ҷавҳаризода
