Ҳикматнома
Паёбари Акрам(с) фармуданд:
“Ҳар ки ду қадам дар роҳи таҳсили илм бардорад ва ду соат дар ҳузури олим биншинад ва ду калима аз ӯ бишнавад, Худояш ду биҳишт бар ӯ ато кунад, ки ҳар як ду баробари дунё бошад”.
* * *
“Ду табақаи уммат аз шафоати ман маҳруманд: зимомдори ситамкор ва гуноҳкори ошкор”.
* * *
“Имон ва ҳаёро ба як ришта бастаанд; ҳар гоҳ яке рафт, он дигар ҳам хоҳад рафт”.
* * *
“Савоби ду ибодат аз ҳама зудтар мерасад: эҳсон ба хешовандон ва ёрии ситамдида. Ва кайфари ду гуноҳ аз ҳама сареътар дода мешавад: аз хешон буридан ва ба мардум ситам кардан”.
* * *
“Чи басо фарқ аст миёни коре, ки лаззаташ биравад ва гуноҳаш бимонад ва коре, ки ранҷаш бигзарад ва аҷраш андӯхта шавад. (Аввалӣ корҳои ҳаром аст ва дуввумӣ амалҳои солеҳ)”.
Сомонаи фарҳангӣ-иҷтимоии Қаламонлайн
